New Page 0

مارد المصباح الليبي ...والمعارضة الليبية

( جزء اللقاء 2 )

اهدي هذا المقال لعاشق الزهور الذي هناك بيوم العيد , اهديه لأهل الشرف من ابناء بلادي فقط والذين يحبون ليبيا

السلام عليكم

اشكرك شاطئي على عطياك وهدياك وهباتك الغالية ,والتي كنت اضنها انها حلم سريالي ما بجوف الخيال .. الذي قشوره الرمز وابجديته عتابات غائبة بين قنابر القهر وفجيعة البلاد....

اشكرك شاطئي على الكنز , ولكن كنز بلادي هي انها ارضي التي احب , اشكرك شاطئي فأنا اشكرك على كل شيئ..كان هدياك ليا بهذه الحياة وعلى هذه الارض .

لعلنا بالجزء الأول تعرفنا ان المصباح ومارده الجبار القوي هو حقيقة لا خيال ..اليس كذلك ؟ وكيف تم بناء قرية الرمال وسورها العالي الصاعد بعلو نحو قلب السماء وكيف جمع به كل من اهان او اذل ابناء ليبيا جميعاً و بطرفة عين , وكيف عينا ووكلنا قاضي ليبي ابن ليبية حقيقي انفه لم يدنسه لا دينار او دولار خلستاً او سرقة بزمن صمت به القضاة خوفاً ,ورشوتاً دون أي حياء .. وكذلك صمت به من يحمل جواهر ودرر كتابنا المقدس النقي وبكل يوم جمعة عبر منابر بلادي ..ولكي يكون قاضينا على كرسي للعدل الذي غاب ثراه عن بلادنا و بهذه الدنيا وليحاسب كل من فهم خطاء ان العدل والحقوق هي هزل واللاحقيقة , فهل بالأخرة هي ايضاً خيال وحلم ما سريالي المنبت والمخرج ؟

ومن هنا قد جاء هذا العدل والحساب المرير لأهل تلك القرية الظالم اهلها ... ولكنني كسيد و كأمبراطور عظيم ..نعم فأنا امبراطور عظيم , فالعظمة هي منحه من شاطئي بلادي الغالية لي وليست من أي كان , ولكنني اقترحت بل أمرت المارد المصباح الجبار وقبل خروجي من تلك القرية العفنة الرائحة والروائح ان ينشيئ خادم المصباح الجبار بنك مالي ..وكيف ان المارد تسائل هنا بعجب ...بنك مالي ..في خضم تراسل الكلمات ... وماذا تريد من هذا البنك بهذه القرية يا سيدي ..ورددت فوراً على سؤال ماردي المصباحي الشهم ...هذا البنك يا مارد يا عظيم اريد منه ان يقبض المال ولا يدفع أي مال او نقد , بل مهمته تحصيل النقود فقط , فلليبيا واهلها اموال ضائعة بجيوب من كانوا ...ولهذا فإن ضوء الشمس ونور ربي ليس مجاني بهذه القرية العقاب و ذات الرمال الحارقة ..ولأن كل شيئ كان لهم بمجانية بليبيا .. لحد الأستغوال ..لحد اللهمجة وبردودة وجوه ...وكذلك الهواء ..نعم فهل تصدق ان الهواء والذي هو هبة ربانية مجانية لكل البشر والمخلوقات قد اقتربوا هؤلاء ان يحاسببوننا عليه ...فربما قد اقتربوا ان يجعلوا لنا جمعيات لبيع الهواء , بحيث يستأنس الليبيين لتلك الطوابير الفاجعة على قناني للهواء ببلد الرخاء !! فكل من يريد ان يستنشق هواء منهم بقرية العقاب الان ان يدفع لهذا البنك المالي..نعم ليدفع قيمة الحياة و قيمة ذلك الهواء ..ولنسهل الأمر على اهل تلك القرية بديمقراطية ويسر وعدم تجني فإننا سنجعل القنينة الواحدة بمليون دينار ..فهم من أغنى الأغنياء بالدنيا وحساباتهم قد فاقت كل الوصف وكل الحدود وهزارهم اصبح بمليرات الدولارات , ولعل ضوء النهار ايضاً ومن يريده ايضاً بمليون ...فلكل شيئ سعره وقيمته يا مارد المصباح العملاق بالقرية الرملية الصحراوية الظالم اهلها , فمثلاً الأكل الفاخر ( الخبزة والميييي ) تساوي الوجبه منه مليون ونصف دينار ..(يا بلاش ), اما العلاج ومصاريفه يا مارد المصباح فهم عباقرة بالطب بل وعباقرة افذاذ لكي يحولوا الرمل الى مساحيق علاجية ومضادات حيوية بشرية وكذلك تجميلية ليضعوها على وجوههم الجميلة التي ربطها القدر بوجوه ابناء ليبيا لطيلة 37 عام ... فلا لجان طبية بالقرية الصحراروية يا مارد المردة او منح خارجية .

اذا ضع امهر المحاسبين بهذا البنك يا مارد المصباح ...حاضر سيدي امرك مطاع ...وخوذني الى طرابلس عروسي الغائبة عني والمغيبة عن بحرنا الجميل ..خوذني هناك لنرتب الأمور معاً يا مارد ...امرك مطاع يا سيدي ...ولاتنسى بنغازي وكل البلاد .

اذا هذه طرابلس الغرب عاصمة ليبيا ...نعم يا سيدي ... احرس المدينة يا مارد بل وكل البلاد , ولا تجعل بها أي من كان قد أهانها يوماً او استخف بأهلها ...نعم نعم فكلهم هناك يا سيدي هناك ..بقرية الرمال الصحراء , قرية الحساب والعقاب والفردوس العدل الذي لا يخطئ...حسناً حسناً يا مارد , اذا مدينتي طرابلس نظيفة الأن ..نعم يا سيدي فطرابلس اصبحت نظيفة وانظيفة ..

اتعرف المعارضة الليبية يا مارد المصباح ...نعم ،نعم , واجل اعرفهم فأنا اعرف كل شيئ ...وكل شيئ ...

اجلبهم لهنا كلهم و بتراب الدار يا مارد ...امرك مطاع يا سيدي .. ولكن اين تريدهم يا سيدي ؟ ... اتعرف السرايا الحمراء يا مارد المردة ؟ ..نعم اعرفها ..تلك التي تحتفي برائحة البخور بالقديم وبها التاريخ ...نعم بها تذاكر للتاريخ الليبي منذ القديم ... ولكن بها صور دخيلة لوجوه قد أسأت للتاريخ يا سيدي ...نعم نعم هؤلاء الدخلاء وكل الصعاليك وصورهم رحلهم لهناك بتلك القرية يا مارد لعلهم يخترعوا بها (الدسكوفري والباث فيندر) فهم مخترعون افذاذ ... سمعاً وطاعة يا سيدي ... سمعاً وطاعة يا سيدي... الان اجمع هؤلاء المعارضة الليبية امام ذلك المبنى الوردي , واحذر ان لا يكون المكان نظيف ..لأن هؤلاء المعارضة تعودوا على النظافة بتلك المدن او اماكن المنفى الجبري لهم ... واجعل لي ايضاً منصة متواضعة هذه المرة لأخطب فيهم وارى ما هم فاعلون !! منصة متواضعة ..نعم متواضعة ..ليست كالتي هناك ..

( من هذا الشخص ..من هذا ؟ من هذا ؟ تهذي مش طرابلس يا هووو ..بالله الا السرايا الحمرا قصر القرماليين زمان .. بلا من المانيا الى هنا بهذه السرعة ..يا (......) يا (......) كيف صار شكلهم الامريكان والـ C.I.A لعبوها امعاه وجابونا هنا بيش ايعلقونا نفر ..نفر ..فرداً.. فرداً ...لا حول ولا قوة الا بالله ..لا حول ولا قوة الا بالله ..انا لله وانا اليه راجعون ..انا لله وانا اليه راجعون ...ياسين والقران الحكيم ...بلا ..بلا احصلنا بين ايده احصلنا يا هووو ..حيه عليكم حيه ..حيه ...غير اسكت يا راجل وانت اتنق على روسنا ونهارها الازرق ...تي اسكت يا حصلة ...ولا شكلهم اللجان الثورية يبوا ايورونا حقوق الإنسان والكتاب لخضر وشروحه الخيالية النفيسة اكويس هال المرة ....حيه بلا نهارنا فيشطة ...قالك حقوق انسان ..زغرتي يا مريمونة ويا مكلوبة نهارنا زرقيني ..سويسرا اه ..لندن اه ..اهوو بوسليم جاكم وانتوا اتهدرزوا عليه جاكم هادا كان وصلتوه اصلاً )

الأمبراطور : هل انتم ما يسمى بالمعارضة الليبية ؟

ولم يرد كل الحاضرين على السؤال !!! اكرر ...هل انتم رجال المعارضة الليبية ام لا ؟

( بلا شكلها محكمة فورية هال المرة ..يا حجاج )

ورد احدهم : نعم نحن رجال المعارضة الليبية بالخارج ...

انتم بس معارضة .. والبقية منكم ماذا ؟ البقية ماذا ؟

هؤلاء في النص جايين يا سيد ...قول سيدي الامبراطور لو سمحت ؟

( امبراطور ..امبراطور ...بلا النهار اللي كنا نرجوا فيه يا هووو ...غي ..غير اسكت يا ودي ..غير سكر فمك وانت ديما تدوي واتنق ...تي مرات يقعد الاحمق دار انقلاب وقعد امبراطور وطبعاً هو ايحبنا مية مية ...قالك شفافية ..اهي الشفافية يا وجه النكد ..شوف بالله طب زن كنا في طرابلس )

حاضر يا سيدي الأمبراطور .

الأمبراطور العظيم : تراه يا مارد المصباح ديري فرز بالله للناس اللي تدفع بثمن غالي لأجل ليبيا والذين كانوا صادقين وترا عروقهم وهم يحترقوا لأجل البلاد .وافرز يا خادم المصباح اؤلئك الذين مادين اوجوههم وناسيين ليبيا وحتى بمظاهرة وحدة لا يخرجوا خوفاً على احذيتهم ان تتسخ و لأجل من يموتوا من اهلهم كل يوم في ليبيا ابلادهم الضائعة , والذين ضاربهم الخوف والجبن والهلع وعايشيين بدون معنى بخارج البلاد ..افرزهم ليا يا خادم المصباح ..افرز وعد يا خادم المصباح ..

اطلع انت اطلع انت وحتى انت ...وانت ياللي غادي تعال ...تراه انت تعال منغير اطروح بالله...انتم ياللي غادي قربوا هنا بالله منغير لسونة زايده تراه ..

مارد المصباح : ها هم يا سيدي . هذه المجموعة القليلة هي اللي دمائها نقية وتحمل ارث الأجداد الاولين , ويحملوا بين حناياهم الحب الصادق الغير مزيف لليبيا واهل ليبيا ...وهؤلاء الذين هناك ماسكين خيرهم وشرهم وجايين في النص لا مع ولا ضد ياكلوا في الكورن افليكس والجيلاتي اللي ايخوف والجبينة الدينماركية والزبيدة الصح ولا حس لا خبر عن ليبيا .. اما هؤلاء والذين هم هناك فمنهم من باع كل شيئ ومنهم من يسجل ليل نهار بالتقارير ويرسلها لأسياده بليبيا .

الامبراطور : يسجل بالتقارير ,اه تقارير يبيع في ابناء بلاده , ابب ..ابب ...طول..طول.. يا خادم المصباح مع جماعتهم غاديكا ..طول و وريهم العين الحولة.. قالك.. ايبيعوا ويسجلوا يا سلام ..صار انتم متخرمدين بين الناس اللي ملهمش لا حيل لا قوة واتفتلكوا بالتقارير .. نهاركم برتقالي صحراوي .. نهاركم احرف .. شيلهم شيلهم توا .... امرك مطاع يا سيدي امرك مطاع يا سيدي الأمبراطور .

اانا نبي الرجال منهم والنساء الحراير فقط يا مارد المصباح .. واللي في النص بالله هلكم .. وكنا تبوا ترجعوا لبلاد الفرنجة ما عنديش أي مانع ..لكن ليبيا انسواها هه كيف ما انسيتوها في الايام الغبرة ...

صار انتم الرجال الأحرار اللي ذوبتم شلايكم وجيبوكم الفقيرة اصلاً لأجل ليبيا , ولا نهاركم ابنهار ولا ليلكم بليل .

رجال المعارضة : نعم نحنا .

الأامبراطور مرحبأ بكم ايها الشرفاء ..مرحب مرحب بالرجال ..

عندكم برنامج حقيقي لأجل اصلاح ليبيا ام لا ..يعني برنامج جاهز كيف ما ايديروا الناس ؟

رجال المعارضة : الحقيقة الموضوع جانا فجأة , يا سيد يا امبراطور .. لكن درنا دستور , واشوية برامج .

الأامبراطور : اشوية برامج ...حيه علينا حية , عابيين عليكم والله .. تحرام كان قعد عندكم برامج صحيحة اتقوله للناس ,ومخطاطات جاهزة .. تي الليبيين مش عارفين لا قيادات لا حد منكم , حرام كان اشهرتم قياداتكم المتعلمة , وكل على حسب برنامجه , فالاختلاف بينكم ليس حرام , وتوطدوا علاقاتكم بأهلكم بالداخل ...تي ..حرام ولاعيب كان عرفوا الليبيين من انتم تي بالك انتم مش ليبيين , الليبيين يبوا زريعة كل واحد فيكم عيني عينك وبيش اتسكروا افواه المزورين والخنابة اللي يكرهوا ليبيا واهل ليبيا ..

خادم المصباح : اسمع في مظاهرة قادمة الينا يا سيدي الامبراطور .

الأمبراطور : مظاهرة .. هيه خوذلك ..بدينا في الوجيج شكلنا ... شوف هال المظاهرة يا مارد .

المارد : هضوما وجهاء الشرق الليبي وبنغازي يا سيدي الأمبراطور .

الأامبراطور : وجهاء .. بنغازي ..الشرق الليبي !!! وخيرهم شني يبوا . ( توا عرفتوا المظاهرات وانتم كنتم داكين روسكم وازعمك (لحبال منا ولا منكم ) ..لا حول ولا قوة إلا بالله ...

المارد : عارفين انك الامبراطور الجديد للبلاد ويعترضوا لعدم الأهتمام بهم .

الأمبراطور : لا لا قوللهم يا مارد انتم الخير والبركة وليبيا كلها وكلها هي ليبيا ...وهنا بيش نحق الحقوق وننتصر للمظالم فقط ..

مارد المصباح : فيه تليفون مستعجل يا سيدي من وزارة الخارجية الامريكية ( كونداليسا رايس )

الأامبراطور : رايس .. وكنها وجه العــ.... شني تبي ...تراه قوللهم محطة البنزينه مغلقة لمدة يومين يا مارد , المحطة والبقرة اللي تحلب في خيرات البلاد مغلقة ..وعندنا جرد ودراه كبد .... اسمع يا مارد تقدر على الامريكان , راهم امدرهيلي كبدي هلبا .. وخاصة هال كوندليسا خنافس , تقدر ادفها حتى هي بالقرية ....نعم يا سيدي الأمبراطور نقدر حتى على بوها لول نقدر ...

الأامبراطور : يا نجك والله مارد ...اسمعوا يا اهل ليبيا .. اختاروا الراجل الليبي الصح .. المتعلم ..اسمعوا متعلم مش اربيع متعلم ..يعني متعلم ميه ميه و مسلم صح .. ايحب ليبيا اكثر من روحة .. ايخاف على الناس ايحب العدل ..لكن ما ايتمسمرس على الكرسي وايحوس فيها يمين شمال شمال يمين وحتى غرب ..نبوا ليبيا دولة ..دولة صح منظمة بها قانون يسري على الجميع ..مش سي اعمر لا وولد خالتي ايريح فيها مية سنة معتقل اه ... سموها دولة ليبيا فقط , لا عظمى لا اكرنكاطي بالله ... اجعلوا المواطن الليبي يشعر انه من ابناء ادم وليس من ابناء الغولة , اعملوا له ليكون سيد حقيقي متعلم صحيح الجسد والعقل ......اما انا فإنني ذاهب لشاطئي هناك ..

الأمبراطور : يا مارد المصباح الوفي .

المارد المصباح : نعم سيدي الأمبراطور يا حامي الحمى .

الأامبراطور : اتعرف فلسطين والقدس ؟

المارد نعم اعرفها ..فأنا اعرف كل شيئ ...

الامبراطور : خوذني الى القدس بالله عليك يا مارد يا مخلص لأن عندي ادراه كبد , وكبد وبائي املغبن على روحي من زمان نبي انحوله غادي ... ديرلي حفرة كبيرة هال المرة يا مارد ..تكون اقريبة من رام الله ..بالله .

المارد العملاق : امرك مطاع يا سيدي .

والسلام عليكم ورحمة الله وبركاته

محمد الجراح / ليبيا

Freebird_freeland@yahoo.com